नेकपाको स्थायी कमिटी बैठक  स्थगित


काठमाडौं, १३ साउन ।
सत्तारुढ नेपाल कम्युनिस्ट पार्टी (नेकपा)को स्थायी कमिटी बैठक मंगलबार पनि स्थगित गरिएको छ ।

आज बिहान ११ बजेका लागि बोलाइएको बैठक पार्टीका दुई अध्यक्षबीच आवश्यक परामर्श र गृहकार्य गरी सचिवालय बैठकको निर्णय र निर्देशनअनुसार प्रस्ताव तय गर्न बाँकी रहेकाले बैठक स्थगित गरिएको नेकपाको प्रचार विभागका उप–प्रमुख सूर्य थापाले जानकारी दिनुभएको छ ।

 

तर सहमतिको लागि एक महिनासम्म भएको प्रयास पनि सफल नभएपछि नेकपाको विवाद झन् जटिल बनेको छ । प्रधानमन्त्री एवं पार्टी अध्यक्ष केपी शर्मा ओली र अर्का अध्यक्ष पुष्पकमल दाहाल ‘प्रचण्ड’बीच यसअघि भएका छलफल निष्कर्षमा पुग्न सकेको छैन ।

पछिल्ला दिनहरुमा नेताहरुबीच आरोप–प्रत्यारोप बढेको छ । सहमति नभएपछि दुवै पक्ष आ–आफ्नै रणनीतिमा जुटेको छ । असार १० गतेदेखि सुरु भएको बैठक सहमतिको लागि भन्दै पटक–पटक स्थगित हुँदै आएको छ ।

यसअघि साउन ६ गते बसेको स्थायी कमिटी बैठक पनि बाढी पहिरोमा परेकाहरुको उद्धार, राहत र पुर्नःस्थापनामा जुट्ने प्रस्ताव पास गर्दै स्थगित गरिएको थियो ।

प्रतिक्रिया दिनुहोस

<