कोरोना पुष्टि भएका युवकको अवस्था गम्भीर, क्रिमसन अस्पताल सिल

2020-05-18-14629

लक्ष्मण पौडेल
भैरहवा, जेठ ५ गते । भैरहवास्थित प्रदेश जनस्वास्थ्य प्रयोगशालाको पिसिआर परीक्षणमा कोरोना पुष्टि भएका युवक गुल्मीको मदाने गाउँपालिका – ६ का स्थायी बासिन्दा रहेको पाइएको छ ।
रुपन्देहीको क्रिमशन अस्पतालमा उपचाररत ती युवकको पिसिआर परीक्षणका लागि यही जेठ २ गते स्वाब सङ्कलन गरी भैरहवास्थित प्रयोगशाला ल्याइएको थियो । सङ्कलित स्वाब परीक्षण गर्दा पोजिटिभ पाइएको प्रयोगशालाका निमित्त प्रमुख राजेन्द्र गिरीले बताउनुभयो ।
पेसाले शिक्षक रहेका ती युवक केही समयदेखि जन्डिस रोगबाट ग्रसित रहेको पारिवारिक स्रोतले बताएको छ । उहाँ जेठ १ गते जन्डिसकै उपचारका रुपन्देहीको मणिग्राममा रहेको क्रिमसन अस्पताल आउनुभएकाे थियाे ।
जण्डिसको औषधि खाइरहेका उहाँलाई अचानक श्वासप्रश्वासमा समस्या देखिएपछि स्थानीय मेडिकलमा देखाइएको थियो । त्यहाँबाट उपचारका लागि मोटरसाइकलमा सन्धिखर्क पु¥याइयो । सन्धिखर्क पु¥याएर त्यहाँ रहेको छायाँ पोलिक्लिनिकमा पनि सामान्य चेकजाँच गरिएको थियो । तर अवस्था थप जटिल बनेपछि एम्बुलेन्स खोजेर सीधै रुपन्देहीको क्रिमसन अस्पताल ल्याइएको थियो ।
जेठ १ गते क्रिमसन अस्पताल ल्याइएका उहाँलाई तत्कालै आइसियूमा राखेर उपचार सुरु गरिएको थियो । आफन्तले जन्डिसको बिरामी बताएको र ज्वरो पनि नआएकाले सुरुमा कोरोना आशङ्का नगरी अस्पतालमा भर्ना गरिएको अस्पतालका प्रशासन प्रमुख मनमोहन भट्टराईले बताउनुभयो । चिकित्सकहरूले भने एक्युट इन्सेफ्लाईटिस सिन्ड्रोम देखिएको र निमोनिया भएको भन्दै दुईदिन आईसियूमा राखेर उपचार गरेका थिए ।
आइसियूमा राखेर उपचार गर्दा पनि निको नभएपछि जेठ ३ गते भेन्टिलेटरमा राखिनुका साथै कोरोनाको आशङ्कामा स्वाब सङ्कलन गरिएको थियो । कोरोना पुष्टि भएका युवकलाई भैरहवाको भीम अस्पताल लगिने बताइए पनि राति अबेरसम्म लगिएको छैन । युवकको अवस्था भने गम्भीर रहेको अस्पतालले जनाएको छ । क्रिमसन अस्पतालले मुलुकमा लकडाउन भएदेखि नै ज्वरोका बिरामी नहेर्ने भनेर ब्यानर नै टाँस गरेको थियो । पछि उक्त ब्यानर हटाइएको थियो । “जन्डिसको बिरामीमा देखिने लक्षण देखिएका कारण अस्पतालमा भर्ना गरिएको हो” प्रशासकीय अधिकृत भट्टराईले भन्नुभयो ।
अस्पतालमा उपचाररत युवकमा कोरोना सङ्क्रमण भेटिएपछि सोमबार साँझदेखि नै क्रिमसन अस्पताल सिल गरिएको छ । अस्पताल सिल गरिएपछि कसैलाई पनि अस्पतालमा आवतजावत गर्न दिइएको छैन । अस्पतालभित्र स्वास्थ्यकर्मी, उपचाररत बिरामी र तिनका कुरुवाहरू रहेका छन् । रुपन्देहीको तिलोत्तमा नगरपालिकाले अब परीक्षणको दायरा बढाउनुपर्ने बताएको छ । नगर प्रमुख वासुदेव घिमिरेले अब लकडाउनलाई थप कडा पारिने र परीक्षणको दायरा बढाइने बताउनुभयो ।
रुपन्देहीका प्रमुख जिल्ला अधिकारी महादेव पन्थले सङ्क्रमित युवकको सम्पर्कमा करिब एक दर्जन व्यक्तिहरू रहेको पाइएको भन्दै तिनीहरूलाई तत्काल परीक्षण गरिने र अस्पतालमा रहेका स्वास्थ्यकर्मी र बिरामीहरूको पनि परीक्षण गरिने जानकारी दिनुभयो । “ती युवकको सम्पर्कमा रहेका व्यक्तिहरू पत्ता लागिसकेका छन्, अब उनीहरूको तत्काल परीक्षण हुन्छ”उहाँले भन्नुभयो ।

gorkhapatra online

प्रतिक्रिया दिनुहोस

<