डोजरले जथाभावी सडक खने, नियमन गरौं ः उप–प्रधानमन्त्री

काठमाडौं, २६ माघ ।
उप–प्रधान तथा रक्षामन्त्री ईश्वर पोखरेलले जता मन लाग्यो त्यतै बाटो खन्ने डोजर संस्कृतिको नियमन आवश्यक रहेको बताएका छन् ।

आइतबार राजधानीमा आयोजित सगरमाथा संवाद कार्यक्रमलाई सम्बोधन गर्दै मन्त्री पोखरेलले वातावरण संरक्षणका लागि डोजर संस्कृतिको नियमन आवश्यक रहेको बताएका हुन ।

अहिले जलवायु परिवर्तनको चपेटामा मुलुक परेको भन्दै उनले डोजरको बारेमा पनि कार्यक्रममा छलफल आवश्यक रहेको बताए । खासगरी विकसित मुलुकहरुका कारण जलवायु परिवर्तनको समस्या उब्जिएको बताउँदै उनले त्यसबाट सिर्जित समस्या नेपालजस्ता कम विकसित देशहरुले भोग्नु परिरहेको बताए ।

नेपालमा रहेका गगनचुम्बी हिमालहरुले पृथ्वीलाई चिसो बनाउन मद्दत गरिरहे पनि यो पक्षलाई महत्व नदिएको उनले बताए । सगरमाथा संवाद कार्यक्रमले विश्वको ध्यानाकर्षण गराउन सघाउ पुग्ने मन्त्री पोखरेलको विश्वास छ । उनले भने, ‘यस्ता बहस र छलफलको माध्यमबाट विश्वको ध्यान खिच्न सक्ने छ ।’

विश्व विद्यालयमा अध्ययनरत विद्यार्थीहरूलाई जलवायु परिवर्तनका विषयमा खोज अध्ययन गर्न कसरी सहभागी गराउने भन्ने विषयमा बहस चलाउन पनि उनले कार्यक्रम आयोजकलाई सुझाव दिए ।

प्रतिक्रिया दिनुहोस

<